Открыты наборы в:
Школу диагностики негатива - viewtopic.php?f=24&t=8836
Школу Языческой Магии - viewtopic.php?f=748&t=8780

Акафист священномученику Киприану и мученице Иустине

Тексты молитв, молитвы Богородице, Иисусу, архангелам, святым

Модератор: Анфиса

Аватара пользователя
Анфиса
Супермодератор
Сообщения: 715
Зарегистрирован: 15 сен 2014, 17:17
Репутация: 179
Откуда: Украина
Направление практики: Таро, руны,заговоры,рейки

Акафист священномученику Киприану и мученице Иустине

Сообщение #1 Анфиса » 24 июл 2015, 15:08

Акафист священномученику Киприану и мученице Иустине
Изображение
Кондак 1
Избранный от диавольскаго служения на служение истинному Богу и к лику святых сопричтенный, священномучениче Киприане, моли Христа Бога избавитися нам от сетей лукаваго и побеждати мир, плоть и диавола, да зовем ти:

Радуйся, священномучениче Киприане, скорый помошниче и молитвенниче о душах наших.

Икос 1
Ангельския силы удивишася, како от художества волшебнаго обратился еси, богомудре, к познанию Божественному, покаянием обрел еси ангельское безстрастное житие. Мы же, обращению твоему дивящеся, вопием ти таковая:

Радуйся, обращением твоим Ангелов удививый; радуйся, лик святых возвеселивый.

Радуйся, мудрость свою показавый; радуйся, за Христа венец приявый.

Радуйся, яко тобою бесы отгоняются; радуйся, яко тобою болезни исцеляются.

Радуйся, священномучениче Киприане, скорый помошниче и молитвенниче о душах наших.

Кондак 2
От художества волшебнаго обратився, богомудре, к познанию Божественному, показался еси миру врач: мудрейший, исцеления даруя чествующим тя, Киприане, со Иустиною, с неюже молися Человеколюбцу Владыце спасти души наша, поющих: Аллилуиа.

Икос 2
Разум несовершенен к разумению Истины Божественныя имея, во ослеплении языческом суще, бесовские хитрости изучая, усердно трудился еси. Но уразумев, яко боятся Креста Господня, немощи демонския познал еси и, отвратився служения лукаваго, во храм Господень притекл еси; сего ради зовем ти:

Радуйся, хитрости демонския изучивый; радуйся, прелести служения его обличивый.

Радуйся, змия лукаваго посрамивый; радуйся, Христа прославивый.

Радуйся, мудрых мира сего мудрейший; радуйся, разумнейших разумнейший.

Радуйся, священномучениче Киприане, скорый помошниче и молитвенниче о душах наших.

Кондак 3
Сила Вышняго просветила есть ум твой, Киприане, егда не имеяше успеха в чародействе Аглаида ко Иустине, бесы рекли ти: «Мы Креста боимся и силу теряем, егда Иустина молитися имать». Он же рече им: «Аще вы Креста боитесь, то колико Распятый на Кресте страшнее вам есть», и, познав слабость бесовскую, вшед в храм Господень, пояше со всеми верными: Аллилуиа.

Икос 3
Имеяй ум, просвещенный силою свыше, Киприан шедше ко епископу, прося крещения си, но той, убоявся, отрече ему. Святый же, иде в храм Господень и стояше на Литургии, не изшел есть из храма, диакону возгласившу: «Оглашенные, изыдите». «Не выйду из храма, — рече Киприан ко епископу, — дондеже не окрестиши мя». Мы же, радующеся твоему вразумлению, поем ти таковая:

Радуйся, силою свыше просвещенный; радуйся, Господом вразумленный.

Радуйся, силу Креста познавый; радуйся, демонов от себя отгнавый.

Радуйся, жизнь свою исправивый; радуйся, стопы в Церковь направивый.

Радуйся, священномучениче Киприане, скорый помошниче и молитвенниче о душах наших.

Кондак 4
Буря помышлений одержаше тя: како прияти крещение. Взем же свои чародейския книги, святый сложиша я на средине града и зажже их, поя Богу: Аллилуиа.

Икос 4
Услышав о тебе епископ, о благом намерении во Христа облещися, крестил тя и чтецем во храме Божием поставил. Сего ради вопием ти сице:

Радуйся, духов злобы победивый; радуйся, чародейския книги попаливый.

Радуйся, христианином быти возжелавый; радуйся, святое крещение приявый.

Радуйся, епископом наставленный; радуйся, чтецем во храме поставленный.

Радуйся, священномучениче Киприане, скорый помошниче и молитвенниче о душах наших.

Кондак 5
Боготканную одежду святаго крещения приявше, о Киприане, усердно молился к Богу о прощении грехов, прежде содеянных, неустанно воспевая Богу: Аллилуиа.

Икос 5
Видяй епископ подвиги и труды твоя, священномучениче Киприане, пост, многонощное бдение, коленопреклонение, молитвы слезныя, по прошествии месяца поставил тя диаконом. Мы же, благодаряще Бога, восхваляем тя:

Радуйся, день и нощь к Богу взывавый; радуйся, руце свои к Нему простиравый.

Радуйся, о прощении Того просивый; радуйся, слезныя молитвы Ему приносивый.

Радуйся, пламенную любовь к Богу показавый.

Радуйся, священномучениче Киприане, скорый помошниче и молитвенниче о душах наших.

Кондак 6
Проповедник истины Христовой явился еси, славный священномучениче Киприане, поревновавый боговидцем Апостолом, просвещая люди Христовым учением, они же, познавше Господа Иисуса Христа, поют Богу: Аллилуиа.

Икос 6
Возсия в сердце твоем свет Божественныя благодати, Киприане, вознесе тя на высоту духовнаго совершенства, сана священническаго достигший, а послежде во епископа посвященный. Сего ради молитвами твоими ко Господу просвети и наша сердца, тепле молящихся ти:

Радуйся, во епископа посвященный; радуйся, на высоту орла вознесенный.

Радуйся, граде, верху горы стоящий; радуйся, светильниче, пред Богом горящий.

Радуйся, молитвенниче к Богу неустанный; радуйся, учителю, Богом дарованный.

Радуйся, священномучениче Киприане, скорый помошниче и молитвенниче о душах наших.



Аватара пользователя
Анфиса
Супермодератор
Сообщения: 715
Зарегистрирован: 15 сен 2014, 17:17
Репутация: 179
Откуда: Украина
Направление практики: Таро, руны,заговоры,рейки

Re: Акафист священномученику Киприану и мученице Иустине

Сообщение #2 Анфиса » 24 июл 2015, 15:25

Кондак 7
Хотя Человеколюбец Господь всем спастися, дарова нам дивнаго молитвенника, заступника и целителя от духов злобы поднебесных, делы бо и словесы твоими приводил еси многих к покаянию и исправлению греховныя жизни, научая всех пети Богу: Аллилуиа.

Икос 7
Новый мудрейший врач явился еси миру, священномучениче Киприане, понеже молитве твоей никакия чародейственныя дела противостати не могут, сейчас же разрушаются и прогоняются, от злых человек пущенныя и лукавых бесов. Мы же, видяще в тебе таковую Божию силу, вопием ти сице:

Радуйся, волшебных козней разрушителю; радуйся, страшных бесов прогонителю.

Радуйся, от тебя же духи злобы, яко дым исчезают; радуйся, тяжко мучимых тии скоро оставляют.

Радуйся, от бед и скорбей скоро избавляющий; радуйся, страдания в радость обращающий.

Радуйся, священномучениче Киприане, скорый помошниче и молитвенниче о душах наших.

Кондак 8
Странное чудо является притекающим к тебе с верою, священномучениче Киприане, ибо данною тебе от Бога благодатию изгоняти духи нечистыя, мучащия человека, бесы изгоняются, больные исцеляются и поют Богу: Аллилуиа.

Икос 8
Всем сердцем предался еси Богу и всею душею возлюбил еси Его, все твое тщание и желание направляя воеже исполнити волю Его, ты же, яко пастырь добрый, не отринул еси бедами отягченных, но предстательствуеши в молитвах пред Господом, даруя исцеления и утешение. Мы же, восхваляюще любовь твою к Богу, взываем ти сице:

Радуйся, всем сердцем Христа возлюбивый; радуйся, добродетельми преисполненный.

Радуйся, недугующим и разслабленным поможение; радуйся, в скорбех и печалех утешение.

Радуйся, наветов и искушений, от мира, плоти и диавола находящих, прогонителю; радуйся, всех болезней душевных и телесных исцелителю.

Радуйся, священномучениче Киприане, скорый помошниче и молитвенниче о душах наших.

Кондак 9
Вся Ангельская воинства возвеселишася, видя тя воина Царя Небеснаго непоколебима и со дерзновением Христа проповедавша, егда веден был на мечное сечение вместе со Иустиною. Ты же болезноваше за нея, да не отречется от Христа, егда увидит тя усекнута, увещал еси мучителей, да исперва ю, а по ней и тя усекнут; подклонив же под меч главы своя Богу воспели есте: Аллилуиа.

Икос 9
Витии многовещаннии не возмогут по достоянию восхвалити страдания ваша за Христа, не убоялися есте прещений лютых, но со светлыми лицами предстасте судилищу цареву, воздвизая всех верных воспевати вам сице:

Радуйтеся, веры Христовой непоколебимии исповедницы; радуйтеся, Пречистыя Троицы дерзновеннии проповедницы.

Радуйтеся, мучения лютая нивочтоже вменившии; радуйтеся, яко страдания ваша в храмах Божиих величаются.

Радуйся, священномучениче Киприане, скорый помошниче и молитвенниче о душах наших.

Кондак 10
Спасти хотя души всех одержимых нечистыми духами, не преставал еси взывати ко Господу, священномучениче Киприане, тебе бо дадеся благодать молитися за ны, да помиловани и очищени воспоим Богу: Аллилуиа.

Икос 10
Стена твердая и крепкая ограда буди нам, священномучениче Киприане, от враг видимых и невидимых, с теплою верою и любовию к тебе прибегающих, да ограждаеми и спасаеми тобою, воспоем ти сице:

Радуйся, смирением духов злобы победивый; радуйся, огнем молитвы стрелы вражия попаливый.

Радуйся, от враг видимых и невидимых стено и ограждение; радуйся, Православныя Церкве преславное украшение.

Радуйся, оставленных врачами предивное поможение; радуйся, прелюбимое скорбящих утешение.

Радуйся, священномучениче Киприане, скорый помошниче и молитвенниче о душах наших.

Кондак 11
Пение непрестанное Пресвятей Троице паче иных принесл еси, священномучениче Киприане, за Господню милость к падшим грешником, Иже благоволи недостойнаго достойным сотворити и сопричесть святому Его стаду. Мы же, благодаряще Бога за таковую милость к нам грешным, зовем Ему: Аллилуиа.

Икос 11
Светозарная свеща был еси, богомудре, в Церкви Христовой, просвещая невещественным светом души верных. Просвети и наша грехом отягченная сердца, поющих ти таковая:

Радуйся, яко Господь милость Свою к падшим грешником на тебе показа еси; радуйся, яко тя из рова погибели, яко овча заблудшее, изъял есть.

Радуйся, из недостойнаго достойным сотворенный; радуйся, святому стаду Христову сопричтенный.

Радуйся, яко светом невещественным души просвещаеши; радуйся, заблудших на путь правый наставляеши.

Радуйся, священномучениче Киприане, скорый помошниче и молитвенниче о душах наших.

Кондак 12
Благодать дана ти от Бога попирати силу вражию и всякое сатанинское нахождение, победил бо еси враги твоя и мученической кончины достигл еси, ныне же, предстоя престолу Царя славы, молися о нас, да избавимся от пленения диавольскаго и избавлены вопием Богу: Аллилуиа.

Икос 12
Поюще ревность твою по Бозе, дивная и преславная чудеса твоя, величаем и восхваляем тя, священномучениче Киприане, таковую благодать от Бога приемшаго, молим же тя, егда в час смерти нашея демонския полчища окружат души наша, тогда яви нам заступление свое, да избавленнии тобою, воззовем ти сице:

Радуйся, от находящих вражиих сил скорое защищение; радуйся, от скорбей и печалей избавление.

Радуйся, Христа до конца возлюбивый; радуйся, душу свою за Него положивый.

Радуйся, в крови Агнчей омывыйся; радуйся, во дворех Господних вселивыйся.

Радуйся, к сонму святых сопричтенный; радуйся, Трисиянным Светом озаренный.

Радуйся, священномучениче Киприане, скорый помошниче и молитвенниче о душах наших.

Кондак 13
О предивный и преславный угодниче Божий, священномучениче Киприане, скорый помощниче всем к тебе прибегающим, приими от нас недостойных хвалебное пение сие, от недугов исцели, от враг видимых и невидимых заступи и вечнаго мучения избавитися нам Господа умоли, да с тобою воспеваем: Аллилуиа.

Этот кондак читается трижды, затем 1-й икос: «Ангельския силы…» и 1-й кондак: «Избранный от диавольскаго служения…».

Молитва
О святый угодниче Божий, священномучениче Киприане, скорый помощниче и молитвенниче о всех к тебе прибегающих! Приими от нас, недостойных, хваление сие, испроси у Господа Бога в немощех укрепление, в печалех утешение и всем вся полезная в жизни нашей; вознеси ко Господу благомощную твою молитву, да оградит нас от падений греховных, да научит нас истинному покаянию, да избавит нас от пленения диавольскаго и всякаго действа духов нечистых и укротит обидящих нас. Буди нам крепкий поборник на вся враги видимыя и невидимыя, подаждь нам терпение во искушениих и в час кончины нашея яви нам заступление от истязателей на воздушных мытарствех, да водимии тобою, достигнем Горняго Иерусалима и сподобимся в Небеснем Царствии со всеми святыми славити и воспевати пресвятое имя Отца и Сына и Святаго Духа во веки веков. Аминь.


  • Похожие темы
    Ответы
    Просмотры
    Последнее сообщение

Вернуться в «Работа с молитвами»



Кто сейчас на конференции

Сейчас этот форум просматривают: нет зарегистрированных пользователей и 1 гость

Новости форума

Последние сообщения

Опросы